Sat, 11 Jul 2020

Aklanon News: Baybayon it Boracay bukas eon sa mga Akeanon

Philippine Information Agency
07 Jun 2020, 10:38 GMT+10

KALIBO, Aklan, Hunyo 7 (PIA) - Bukas eon sa mga residente it Aklan umpisa ku Hunyo 1 ro makaingganyo nga kapution it baeas ag malinaw nga tubi it baybay it Isla it Boracay pagkatapos it masobra daywang buean nga pahuway hanungod sa coronavirus pandemic.

Sa pagbutang sa bilog nga probinsya it Akean sa Modified General Community Quarantine umpisa Hunyo 1 asta 15, ro pagpaligos sa mga baybay, kaeakip ro sikat sa kalibutan nga baybayon it Boracay, hay ginasugtan eon pero dapat hugot nga pagatumanon ro minimum public health standards.

Pero sa makaron, suno kay Aklan Gobernador Florencio Miraflores ro Isla it Boracay ag ro ana nga mga baybayon hay para eang anay sa mga Aklanon bago raya amat-amat nga pagabuksan sa mga lokal nga turista halin sa sueod it Panay ag sa mga low risk nga mga probinsya.

Base sa guidelines nga ginpaguwa it Local Government of Malay nga nakabutang man sa Executive Order No. 27, Series of 2020 nga gin-isyu ni Acting Mayor Frolibar Bautista, ro pagpaligos sa baybayon it Boracay hay pagasugtan eamang umpisa 6 am asta 6 pm.

Sa dugang, ro Malay nga panggobyerno hay nagdesignar it temporaryo nga lugar nga pwede paligsan kaparehas it sa prenti it White House Beach Resort, Willy's Rock ag Elizalde Compound tanan sa station 1; samtang sa station 2 hay sa atubang it D'Mall D'Boracay ag Boracay Mandarin Island Hotel.

Sa Station 3, ro swimming areas hay sa atubang it La Carmela de Boracay Resort Hotel ag Paradise Garden Resort Hotel; ag sa Barangay Yapak, sa sikat nga Puka Beach.

May mga nakabutang mat-a nga mga red flags sa mga non-swimming areas.

Para malimitahan ro numero it tawo ag masigurado nga pagasundon ro physical distancing it indi magnubo sa daywang metro, ro mga magapaligos hay marehistro anay sa gin-establisar nga lifeguard station sa kada designated swimming areas.

Pagkatapos nga marehistro, ro mga minugpaligos hay bue-an it temperatura bago pagasugtan nga mag-agto sa baybay.

Ro publiko hay ginapadumdum nga ro pag-arkila ag pagpahueam it goggles ag snorkeling masks hay hugot nga ginabawae; kaya ginamanduan ro mga minugpaligos nga magdaea it anda nga personal nga gamit.

Samtang, nag-apela si Miraflores sa publiko nga mangin responsible ag pirmi obserbahon ro physical distancing, pagsuksok it face mask, paghugas it alima gamit ro sabon ag tubi para matapna ro pagkalat it coronavirus. (JSC/SQP/PIA-Aklan)

More Malaysia News

Access More

Sign up for Kuala Lumpur News

a daily newsletter full of things to discuss over drinks.and the great thing is that it's on the house!